الله ياحلـم السمـاوات: مااحـلاك!

الشمس تولد يالضيـا فـي محيـاك
وتموت لامن غاب عنهـا شعاعـك


وشلون تبغاني اوادعـك وانسـاك؟
وانت المجرة تختفي فـي وداعـك


دمع الكواكب خر نجمـات لعينـاك
على الوداع المـر تبكـي ضياعـك


الله ياحلـم السمـاوات: مااحـلاك!
احلى من ( احلى) والحلا في طباعك


وجهك قمر..ولثامك الغيـم يغشـاك
يبيـن لا حـرك هوانـا قنـاعـك



نحت (احبك موت) في ثلج ذكـراك
وذاب وبقى (موتي) بنار امتناعـك


والكلمة اللي هزت عروش الافـلاك
اقولها ويفلت مـن ايـدي متاعـك


قلت: الوداع , وطاحت بخوف يمناك
حقايبـك, ولا دمـوع ارتيـاعـك؟


وموج الاسى يمسح اثر فرحة خطاك
يا ساحبٍ قلبي على شـوك قاعـك


تصادمت كـل الكواكـب بفرقـاك
شفت انهيار الكون لحظـة وداعـك